“Konstituimi i Kuvendit të Kosovës i ka hapur rrugë formimit të qeverisë së re sipas procedurave kushtetuese, por vendi ende nuk e ka kaluar plotësisht krizën politike”.
Kështu u shpreh analisti Agim Krasniqi në një lidhje të drejtpërdrejtë në edicionin qendror të lajmeve në televizionin kombëtar Vizion Plus, me moderator Aleksandër Furxhi.
Sipas Krasniqit, konstituimi i legjislaturës së dhjetë të Kuvendit përbën një zhvillim pozitiv, megjithatë sfida e radhës mbetet zgjedhja e Presidentit të Republikës, proces që pritet të zhvillohet brenda afatit kushtetues deri më 4 mars.
Ai nënvizoi se pengesa kryesore lidhet me mungesën e numrave të nevojshëm në Kuvend dhe vështirësinë për të arritur konsensus politik, çka mund të çojë sërish në një ngërç institucional dhe madje në zgjedhje të reja.
Duke u ndalur te procesi gjyqësor në Hagë ndaj katër ish-drejtuesve të UÇK-së, Krasniqi tha se kërkesat për dënime maksimale nga prokuroria janë pritur me indinjatë në Kosovë dhe perceptohen më shumë si presion politik.
INTERVISTA E PLOTË:
Si mund ta komentoni ju këtë zhvillim të sotëm në Kosovë?
Agim Krasniqi: Sot institucioni kryesor i shtetit të Kosovës, parlamenti, u konstituua dhe i hapet rrugë ndërtimit të qeverisë në procedura të rregullta kushtetuese. Ky është një lajm i mirë sepse skena politike në Kosovë, edhe përkundër shumë përplasjeve që në demokraci janë normale, po maturohet. Sot pamë një maturim të pëlqyeshëm me konstituimin e legjislaturës së dhjetë të parlamentit të Kosovës.
Megjithatë, kriza ende nuk mund të quhet tërësisht e kapërcyer. Në muajin mars pritet të mbahen zgjedhjet presidenciale dhe rruga nuk është krejtësisht e shtruar. Gjasat janë që deri më 4 mars duhet të zgjidhet presidenti i ri i Kosovës, apo jo?
Agim Krasniqi: Kjo është procedurë kushtetuese që kjo legjislaturë të zgjedhë mandatarin e ri për President të Republikës së Kosovës. Se si do të shkojë ky proces, a do të ketë sërish ngërç politik apo do të gjendet një konsensus mes subjekteve politike, mbetet të shihet. Është një pengesë që mund të shfaqet, por nuk dua të paragjykoj.
Cila është konkretisht ajo pengesë?
Agim Krasniqi: Pengesa kryesore lidhet me numrin e votave të nevojshme për të votuar presidentin. Lëvizja Vetëvendosje duhet t’i ketë këto numra. Aktualisht nuk shihet një koalicion i mundshëm dhe mbetet të shihet nëse do të gjendet një konsensus në parlament, apo do të futemi sërish në një krizë që mund të na çojë në zgjedhje, nëse nuk gjendet një figurë konsensuale për këtë funksion shtetëror.
Ndalemi pak te gjyqi që po zhvillohet në Hagë kundër katër ish-drejtuesve dhe komandantëve të UÇK-së. Si po përcillet në Kosovë, sidomos fjala mbrojtëse në mbyllje të procesit të ish-presidentit Thaçi dhe të tjerëve?
Agim Krasniqi: Derisa pala akuzuese kërkon dënim maksimal, kjo i ngjante më shumë një presioni politik publik ndaj gjykatës dhe qytetarëve të Kosovës, të cilët e pritën me indinjatë. I gjithë procesi ka një kompleksitet të lartë. Provat e dëgjuara deri më tani, që lidhen kryesisht me zinxhirin komandues, janë kontestuar vazhdimisht. Gjithashtu, besueshmëria e disa dëshmitarëve është vënë në pikëpyetje. Juridikisht, është pak e besueshme që gjykata do të ndjekë kërkesat e prokurorëve. Përvoja e gjykatave ndërkombëtare tregon se dënimet përfundimtare janë zakonisht dukshëm më të ulëta se kërkesat fillestare dhe shpesh të diferencuara mes të akuzuarve. Edhe nëse ndodh ndonjë dënim, gjë që e besoj pak, ai mund të apelohet në shkallë të dytë, e cila mund të rrëzojë pretendimet e prokurorisë. Kemi raste të mëhershme si ai i z.Haradinaj, z.Gotovina nga Kroacia apo z.Naser Oriç, ku në apelim janë rrëzuar të gjitha provat e ofruara nga prokuroria.
/vizionplus.tv
