Kryeministri i vendit, Edi Rama ditën e sotme ishte i pranishëm në tryezën e IX të Komisionit të Posaçëm Parlamentar për Mirëqeverisjen, Sundimin e Ligjit dhe Antikorrupsionin.
Duke u fokusuar në çështjen e Pronës dhe sfidat e lidhura me Pronën, në kuadrin e negociatave të anëtarësimit në BE, Rama theksoi se duhet një domosdoshmëri për të krijuar një front të madh mbështetës për Shqipërinë drejt rrugës në BE.
Rama e bëri të qartë se synimi i Shqipërisë është ulja në tryezën e Bashkimit Evropian dhe bëri me dije se komisioni antikorrupsion do të jetë i përhershëm dhe do të jetë pikë referimi për të gjitha institucionet.
Në mbyllje, kreu i qeverisë tha se është plotësisht e mundur që të realizohet ambicia për tu anëtarësuar në BE.
Në rend të ditës të punimeve në Komision është tryeza e nëntë publike me temë: “Garantimi i së drejtës së pronës dhe lufta kundër korrupsionit në sektorin e pronave”.
Rama: Parlamenti duhet të bëhet epiqendra e një ndërveprimi intensiv që fillon me këtë fazë të këtij procesi dhe që në këndvështrimin tim duhet të vazhdojë deri në momentin kur Shqipëria të anëtarësohet në BE. Mënyra se si Komisioni i Posaçëm do të transformohet në një mekanizëm permanent brenda Parlamentit do të përcaktohet nga vetë ky proces kur do dalin konkluzione dhe detyra për të gjitha institucionet dhe për të treja pushtetet; legjislativ, ekzekutiv dhe gjyqësor. Dua të nënvizoj tre gjëra! E para lidhur me këtë proces dhe me vetë këtë Komision. Në këndvështrimin tim, ky Komision është sot një instrument i pazëvendësueshëm dhe i patjetërsueshëm për sukesin tonë në procesin e anëtarësimit dhe për suksesin tonë në negociata.
Në BE ne nuk shkojmë si qeveria e Shqipërisë por shkojmë si një front institucionesh dhe si një front institucionesh që përfaqësojnë tre pushtete, të cilat në marrëdhënien me njëra-tjetërn kanë hapësira komunikimi, por kanë dhe kufi. Koordinimi i gjithë këtij fronti dhe ecja në mënyrë uniforme sa i përket perfomancës në raport me negociatat, mund të garantohet vetëm nëse Kuvendi bëhet një udhëkryq ku të gjitha forcat që veprojnë në emër të shtetit, pikëtakohen dhe nga ana tjetër të gjitha këto forca mund të japin llogari sepse mund t’iu kërkohet llogari.
E dyta që dua të theksoj është që shumëkush dhe gjithmonë, sa herë që ka një iniciativë të re, sa herë që ka një përpjekje të re, ngrihet dhe thotë ‘tani u kutjuat ju?’ Ne nuk jemi kujtuar tani, jemi kujtuar që ditën e parë që jemi në këtë detyrë, por në çdo hap të rrugës ka sfida të reja dhe nga ana tjetër, çdo hap kërkon kohën dhe forcën e vet. Duke folur për pronën është shumë e qartë që nëse kthejmë kohën mbrapa, ne kuptojmë dy gjëra, që ajo që është bërë është shumë voluminoze dhe përmirësimi është shumë i ndjeshëm, por krejt i pamjaftueshëm me pikëmbërritjen. Pikë mbërritja jonë është ulja në tryezën e Bashkimit Evropian.
Në mbyllje dua të theksoj që sot është plotësisht e mundur që ne të realizojmë ambicien për tu anëtarësuar në BE edhe duke plotësuar të gjitha kriteret që lidhen me pronën. Ne kemi sot me vete bekimin e kohës falë teknologjisë. Nëse nuk do të kishim këtë bekim të gjitha këto procese do të merrnin shumë më tepër kohë./vizionplus.tv
