Rreth 1 ton e gjysmë kokainë e fshehur në një kontenier bananesh, është sekuestruar në portin e Santa Marta-s në Kolumbi.
Sipas sektorit të Antidrogës Kolumbiane, droga kishte destinacion përfundimtar Belgjikën.
Sipas mediave spanjolle, nga kontrollet e ushtruara në portin e Santa Marta-s, policët kombëtarë të antidrogës konfiskuan 1,626 kilogramë kokainë të ndarë në pako 1 kilogramëshe në ngjyrë jeshile, në një dërgesë bananesh me destinacion qytetin Antuerp në Belgjikë.
Pakot me kokainë ishin vendosur në një vend të fshehte, për të mos u diktuar, ndërkohë qe policia po vijon hetimet për të zbardhur origjinën e drogës.
Vlera e sasisë së kokainës së kapur, sipas Kolonel Gustavo Berdugo, komandant i Policisë Metropolitane të Santa Marta, arrin vlerën e 89 milionë eurove.
Autoritetet bene të ditur se, që nga fillimi i këtij viti deri më tani, policia kolumbiane ka kapur 10.4 ton kokainë në zonën e Karaibeve, 1.8 nga të cilat në portin e Santa Martës.
