ALMA KOLGJOKA
GJYQTARE, KOLEGJI ZGJEDHOR
“Rrëzohet kërkesa e palës paditëse.”
Me argumentin se provat e depozituara nga Partia demokratike, Lëvizja Socialiste për Integrim dhe Lëvizja “Vetëvendosja” për vjedhje dhe tjetërsim të vullnetit politik janë te pa-mbështetura në ligj, Kolegji Zgjedhor i jep fund kërkesave të PD, LSI dhe “Vetëvendosja” për përsëritje të zgjedhjeve në 9 qarqe të vendit. Pas rrëzimit të ankimimeve njëri pas tjetrit për secilin qark, kjo trupë gjyqësore lë të pandryshuar rezultatin e dalë nga zgjedhjet e 25 Prillit, 74 mandate për Partinë Socialiste, 59 për koalicionin e udhëhequr nga demokratë “Aleanca për Ndryshim” dhe katër për Lëvizjen Socialiste për Integrim.
MARASH LOGU
PERFAQESUES I PD
“Kush nuk është i interesuar për të zbardhur të plotë masakrën zgjedhore të 25 prillit?Kush është i frikësuar nga transparenca e plotë mbi këtë masakër?
Kush është “dora e zezë” që ka mbyllur gojën e komisionerëve të Komisionit të Ankimimeve dhe Sanksioneve në Komisionin Qendror të Zgjedhjeve? Kush është “dora e zezë” që mbyll gojën e gjyqtarëve të Kolegjit Zgjedhor? Kush është “dora e zezë” dhe kriminale që nënshkruan vendime të paligjshme? Përgjigja është një dhe e vetme është Edi Rama.”
Për demokratët dhe Lëvizjen Socialiste për Integrim, beteja ligjore nuk do të ndalet. Së bashku ata do të vazhdojnë betejën ligjore për t’u vërtetuar qytetarëve se vota e 25 Prillit u tjetërsua nga Partia Socialiste, që sipas tyre përdori çdo mekanizëm për blerjen e votës.
MARASH LOGU
PERFAQESUES I PD
“Grupi i juristëve që është pranë Partisë Demokratike do të përgatisë shumë shpejt strategjinë ligjore që ne do të ndjekim në Gjykatën Kushtetuese dhe Gjykatën e Strasburgut për transparencë të plotë për procesin zgjedhor të 25 prillit.”
SILVA CAKA
PERFAQESUESE E LSI
“Ashtu do të jemi edhe ne, pranë Partisë Demokratike dhe Aleancës për Ndryshim në të gjitha betejat, që e përsëris edhe një herë kanë nisur dhe do të përfundojnë bashkë. Nuk ka vetëm institucione shqiptare që ne e dimë shumë mirë sesi janë formësuar dhe sesi komandohen. Do të shkojmë edhe në institucionet e drejtësisë ndërkombëtare.”
Me të nënta vendimet e Kolegjit Zgjedhor kundër shpalljes së pavlefshme të zgjedhjeve që do të çonte në përsëritje të procesit, tanimë i takon Komisionerit Shtetëror të Zgjedhjeve Ilirjan Celibashit të certifikojë rezultatin e 25 Prilli.
Ndryshimi i vetëm që pritet nga kjo vendimarrje, është se kush do të marrë mandatin e deputetit, në qarkun e Durrësit, Vlorës për Partinë Socialiste dhe të Tiranës e Fierit, për Lëvizjen Socialiste për Integrim. Si Edi Rama dhe Monika Kryemadhi ende nuk e kanë vendosur se cilin qark do të përfaqësojnë, për ti hapur rrugë vendimarrjes së KQZ-së, për të përcaktuar përfundimisht emrat e 140 deputetëve të parlamentit të ri.
