Deputeti socialist, Erion Braçe, në Komisionin për Ekonominë dhe Financat, u ndal edhe te shqetësimi i Shoqatës së Bareve dhe Restoranteve, e cila kundërshton përdorimin e pasaportës së vaksinimit për të marrë shërbime në lokale, me argumenton se “do të goditen rëndë”.
Por, sipas Braçes, gjëja më e rëndësishme është vaksinimi i qytetarëve, dhe jo goditja e bizneseve. Braçe tregoi një episod të ndodhur dje me disa qytetarë shqiptarë të cilët donin të shihnin nga afër derbin Milan-Inter në Itali, por që iu refuzua hyja pasi nuk kishin pasaportë vaksinimi.
“Ju folët në parlament, doli ai i bareve dhe restoranteve tha “do të goditemi”. Po le të goditesh. Më elementarja që i kërkohet njerëzve është të bëjë vaksinën. I kërkohet vetëm një vaksinë. Dje janë kthyer kokëboshë shqiptarë që morën përsipër të hynin në stadiumin kryesor të Italisë, u kthyen mbrapsh se nuk kishin pasaportë vaksinimi. Kishin marrë një letër testi në dorë dhe mendonin se do hynin në stadium me letër. Kokëboshët shqiptar, një pjesë u kthyen në aeroport, një pjesë tek dera e stadiumit vetëm për këtë histori. Kurse këtu hyn në stadium, 22 mijë dhe për qejf të atij të Federatës bëhen edhe 28 mijë atje brenda dhe Tirana vazhdon ta vuajë sot me numrin më të lartë të infektuarve të rinj.”
