Ministri Blendi Klosi, i cili kishte edhe rolin e drejtuesit politik të Beratit për PS në zgjedhjet e 25 prillit, theksoi se socialistët arritën një fitore spektakolore jo vetëm në këtë qark, por në të gjithë vendin.
“Në radhë të parë, Berati vazhdon të jetë qarku më i majtë në Shqipëri. Morëm 5 nga 7 mandate, duke siguruar një fitore të madhe. Ishte një fushatë e qetë, pa asnjë incident. Nuk ka qenë një garë e lehtë. U luftua deri në kutinë e fundit.”
I ftuar në “Quo Vadis”, Klosi komentoi edhe hapjen e 24 kutive të votimi të qarkut Berat, të ankimuara nga Lëvizja Socialiste për Integrim.
“Do të jetë një vendimmarje e KAS. Nuk di sa ligjore është procesi deri më tani që u hapën materialet e votimit. Kërksat e LSI kanë një lloj paqartësie.”
I pyetur për ndikimin e Nasip Naços në këto zgjedhje, Klosi tha: “Aty që të gjithë kemi dhënë kontribut. Shumë nga drejtuesit e LSI ishin me ne në fushatë. Fushata e LSI, duke mbështetur Bashën, ndikoi qartazi në votën e Beratit”.
