Asambleja Parlamentare e Këshillit të Evropës diskuton sot raportin për zgjedhjet e 11 majit në Shqipëri. Në këtë raport vlerësohet se zgjedhjet ishin konkurruese dhe u zhvilluan në mënyrë profesionale. Por, njësoj si ODIHR, edhe Këshilli i Evropës vë në dukje se garuesit nuk kishin një fushë të barabartë loje dhe partia në pushtet përfitoi nga përdorimi i burimeve shtetërore gjatë fushatës elektorale.
“Administrata zgjedhore e menaxhoi procesin në mënyrë transparente dhe gjithëpërfshirëse. Partia në pushtet përfitoi nga përdorimi i burimeve shtetërore gjatë fushatës, duke krijuar një avantazh të padrejtë nga qenësia në pushtet.”
Në këtë dokument theksohet se dita e zgjedhjeve ishte e qetë dhe në përgjithësi procesi ishte i organizuar mirë, por raportuesit nënvizojnë se pati pretendime të besueshme për presion mbi punonjësit e administratës publike, keqpërdorim të rrjetit të patronazhistëve, si dhe raportime për blerje vote dhe pretendime për ndikim të elementëve kriminalë në disa parti politike.
Mes rekomandimeve, Këshilli i Evropës nënvizon nevojën për reformë të re zgjedhore.
“Asambleja u bën thirrje autoriteteve shqiptare të adresojnë rekomandimet e Komisionit të Venecias dhe OSBE-ODIHR-it në mënyrë gjithëpërfshirëse.”
Gjithashtu, Këshilli i Evropës nënvizon nevojën për të marrë masa kundër shitblerjes së votës, keqpërdorimit të burimeve shtetërore, si dhe rrezikun e infiltrimit të elementëve kriminalë në procesin zgjedhor.
/vizionplus.tv
