Vendimi i papritur i Prokurorisë Speciale për të publikuar aktakuzat ndaj presidentit Thaçi dhe ish-kryeparlamentarit e kryetarit të PDK-së, Veseli ka shkaktuar reagime të shumta jo vetëm në Tiranë dhe Prishtinë.
Adri Nurellari, këshillitar i Kadri Veselit, e ka konsideruar aktakuzën për krime lufte një veprim politik.
Në një lidhje direkte me edicionin qendror të lajmeve në Vizion Plus, Nurellari shprehet se publikimi i këttij vendimi u bë për të sabotuar bisedimet Kosovë-Serbi në Shtëpinë e Bardhë.
“Veprim politik. Është rishpallje e një akuze që Prokuroria ka paraqitur në Gjykatën e Specializuar që në datën 24. Tri ditë para dialogut u bë rishpallja e të njëjtës temë. Kjo është një dëshmi e parë që ka një prapavijë politike. Kjo u bë për të sabotuar këto bisedime dhe në fakt ia arritën qëllimit. Kanë përmenduar vetëm dy emra, ndërkohë që janë edhe 8 të akuzuar të tjera që nuk janë përmendur. Nuk ka asnjë vlerë ajo akuzë derisa gjykatësi të vendosë nëse do ta pranojë atë rast apo jo. Ka patur tre gjykata ndërkombëtare. Janë çështje të shterruara. Shumica e Kosovës nuk ka asnjë dyshim tek pastërtia e Luftës Çlirimtare të Kosovës. Populli i Kosovës ka mbrojtur veten.”
Sipas tij, aktakuza ndaj Thaçit dhe Veselit ka sjellë një sens solidariteti dhe uniteti, ndërsa shtoi se ngelet për t’u diskutuar se si do të ndikojë në procesin e dialogut.
“Ngelet për t’u diskutuar. Në përgjithësi, kjo aktakuzë ka sjellë një sens solidariteti dhe uniteti që përtej dëshirave të dikujt për të eliminuar rivalët politikë. Ngelet për t’u trajtuar kjo gjë. Kjo nuk është aktakuzë ndaj dy personave dosido, kjo është një aktazukë ndaj UÇK. Pra, kjo duhet trajtuar si një sulm i drejtpërdrejtë ndaj të kaluarës dhe përpjekje për të shtrembëruar historinë. Haradinaj është larguar më shumë për intersa elektoralë. S’ka patur padi për të. Është thirrur ashtu sikur edhe mbi 150 luftëtarë të tjerë. Nuk ka patur një motiv thelbësor.”
Në përfundim të intervistës, Nurellari theksoi se askush nuk duhet të dorëhiqet. “Çdo lloj dorëheqje dhe çdo provokim që ka për qëllim të destabilizojë Kosovën, nuk do të lejohet.”
