Zgjedhja e degës së studimit nga të rinjtë nuk përputhet gjithmonë me kërkesat e tregut të punës. Sipas ekspertes së arsimit, shumë të rinj vijojnë të zgjedhin degë të ndikuara nga familja ose mesatarja, ndërsa një pjesë tjetër orientohen drejt profileve që u japin mundësi punësimi jashtë vendit.
“Këshillimi i karrierës është futur vitet e fundit për t’i orientuar mbi degën që duan të studiojnë. Nuk ka një raport vlerësimi sa efektiv dhe sa ka ndihmuar për të studiuar. Është tradicionale që zgjedhin degë për shkak të traditës familjare dhe pjesa më e madhe më pas janë ata që drejtohen drejt atyre degëve që arrijnë me mesatare. Është e nejvojshme të ketë një ndërlidhje shkollë-universitet dhe kompani të ndryshme që operojnë. Të ketë një platformë të përbashkët”, thotë Linda Pino, eksperte arsimi.
Ndërkohë, në tregun e punës kërkesat janë të përqendruara kryesisht në sektorë si ndërtimi, teknologjia e informacionit apo turizmi. Ekspertët pohojnë se njohuritë që marrin të rinjtë në shkollë nuk janë gjithmonë praktike për tregun.
“50% e kërkesave në tregun e punësimit e ka hoteleri-turizëm, kanali HOREKA, hoteler, restorant, kafeteri, prodhim, ndërtim dhe teknologji-informacion. Tregu është kaotik, ka shumë dinamika, lindin shpejt profesone të reja, praktika të reja dhe është pak e vështiirë të jesh koherent në këtë, por nga ana tjetër mundësia për tu informuar është më e lartë”, thotë Alma Sulçe, eksperte punësimi.
Sulçe sugjeron që të rinjtë të informohen më shumë dhe të zgjedhin degë që lidhen me zhvillimet e ekonomisë, për të pasur më shumë mundësi punësimi në të ardhmen./vizionplus.tv
