Ministrja e Ekonomisë, Delina Ibrahimaj, pas përfundimit të mbledhjes së qeverisë, ka dhënë detaje mbi Programin Kombëtar të Strehimit të prezantuar nga kryeministri Edi Rama dhe ajo vetë një ditë më parë.
Ministrja u pyet nga gazetarët se ku ndodhen apartamentet mevlerë nën 60 mijë euro që mund të përfshihen në skemën e kredive me interes zero.
Ibrahimaj tha se paketa ligjore për programin pritet të miratohet në fillim të tetorit 2026, ndërsa thirrjet për përfituesit do të hapen brenda këtij viti. Sipas saj, fituesit pritet të shpallen në fillim të vitit 2027.
Lidhur me pyetjen se ku gjenden apartamentet me vlerë deri në 60 mijë euro, për të cilat qeveria ka parashikuar kredi me interes zero, ministrja tha se ka banesa të tilla edhe në periferi të Tiranës.
“Ka, në periferi të Tiranës, apartamente që janë me këto vlera. Janë apartamente me sipërfaqe të vogla. Nuk janë apartamente që u dedikohen familjeve të mëdha”, u shpreh Ibrahimaj.
Sipas saj, programi synon veçanërisht çiftet e reja dhe profesionistët që sapo kanë përfunduar studimet dhe duan të krijojnë jetën e tyre pranë vendit të punës dhe shërbimeve.
“Ky program do t’i dedikohet atyre profesionistëve të cilët sapo kanë përfunduar studimet dhe duan të jetojnë pranë vendit të tyre të punës apo pranë shërbimeve dhe duan të nisin jetën duke pasur në pronësi një apartament”, tha ministrja.
Ibrahimaj bëri të ditur se qeveria ka kryer analiza të tregut shqiptar të banesave gjatë vitit të fundit, me synim identifikimin e nevojave të të rinjve për strehim.
“Ne kemi bërë që prej një viti analiza të nevojës së tregut shqiptar. Ky program adreson nevojën që të rinjtë dhe të rejat shqiptare sot kanë për të filluar jetën e tyre”, deklaroi ajo.
Programi i prezantuar nga Rama parashikon 2 mijë kredi me interes zero për apartamente me vlerë deri në 60 mijë euro dhe 2 mijë kredi të tjera me interes 3% për banesa me vlerë mbi 60 mijë euro. Krahas kredive, qeveria ka parashikuar edhe 3 mijë mundësi për qira të subvencionuar në masën 50%.
