Kartelet e drogës dhe grupet e krimit të organizuar ndërkombëtarisht janë riorganizuar për shkak të masave pandemike dhe kufizuese. Gazetari grek i “Kathimerini”, Janis Suliotis ka mësuar se zyrtarët e policisë nuk kanë konfiskuar asnjë sasi droge në aeroportet evropiane gjatë muajit të kaluar.
Ndërsa në aeroportet ndërkombëtare, janë konfiskuar vetëm dy sasi të kokainës në doganat e aeroportit. Ky ishte një fakt befasues për zyrtarët e policisë. Nëse krahasojmë marsin e 2020 me marsin e vitit të kalur, vihet re se rastet e trafikut të drogës janë ulur me 23%, ndërsa arrestimet e trafikantëve me 25%.
Sipas Janis Suliotis, pandemia ka ndikuar edhe në çmimin e drogës. Një kilogram kanabis nga Shqipëria në Athinë është rritur nga 1.500 në 2.000 euro. Çmimi i një grami kokainë është rritur për 10 euro dhe një gram heroinë për 5 euro.
Fenomene të ngjashme vërehen edhe në vende të tjera të Europës. Një raport i fundit i “Financial Times” thotë se një gram hashash është shitur në rrugët e Berlinit deri në 30 euro në vend të 10 që kushtonte para fillimit të karantinës.
Një raport i Institucionit Brookings më 3 prill thotë se mbyllja e kufijve dhe pezullimi i fluturimeve ndërkombëtare e kanë bërë trafikun e drogës në mënyrë të konsiderueshme më të vështirë, dhe ndalimet e trafikut kanë kufizuar tregtinë me pakicë. Për shkak të karantinës, trafikantët kanë ndryshuar sjelljen.
“Trafikantët paraqiten një orë në mëngjes dhe një orë pasdite dhe më pas zhduken. Nuk ka shumë trafik në rrugë dhe për këtë arsye përdoruesit janë në rrezik të kontrollohen nga policia”, thotë një oficer nga shërbimi i qendrës në Athinë.
Nga ana tjetër, Raporti i Nismës Globale vë në dukje se javët e fundit, policia në Shqipëri ka punuar ekskluzivisht për të frenuar kufizimet e trafikut. Por pasi marsi dhe prilli janë muajt idealë për mbjelljen e kanabisit, vlerësohet se prodhimi i këtij viti do të jetë dukshëm më i lartë se në vitet e kaluara dhe pritet që të ketë një “bum”.
