Kapet në Fier 19-vjeçari i kërkuar nga Italia për trafik droge
Një tjetër operacion i suksesshëm është finalizuar nga Drejtoria e Forcës së Posaçme Operacionale në Policinë e Shtetit, për kapjen e shtetasve të shpallur në kërkim ndërkombëtar.
Operacioni policor, i koduar “Operacionalja 59”, çoi në arrestimin e shtetasit Z. Z., 19 vjeç, lindur dhe banues në fshatin Cukalat, Berat. Ai u kap në qytetin e Fierit dhe u ndalua me qëllim ekstradimin drejt Italisë.
Ky shtetas ishte shpallur në kërkim ndërkombëtar nga Interpol Roma, pasi Gjykata e Riminit i ka caktuar masën e sigurisë “Arrest në burg”, për akuzën e pjesëmarrjes në një organizatë kriminale që trafikonte lëndë narkotike. Ai përballet me një dënim maksimal prej 10 vitesh burgim në shtetin italian.
Interpol Tirana po vijon procedurat për ekstradimin e tij, në bashkëpunim të ngushtë me autoritetet italiane.
/vizionplus.tv
