Policia kolumbiane ka sekuestruar 12 tonë kokainë, sasi rekord e zbuluar ndonjëherë në historinë e vendit. Vlera e drogës llogaritet të jetë rreth 360 milionë dollarë.
Sipas mediave, lënda narkotike ishte groposur në 4 plantacione bananesh në veri të vendit, pranë rrugëve të përdorura për kontrabandimin e kokainës në Shtetet e Bashkuara të Amerikës.
Presidenti Kolumbian Huan Manuel Santos, e përshkroi ndërhyrjen e policisë, si aksionin më të suksesshëm, pasi sasia e lëndës narkotike është më e madhja e zbuluar deri tani.
Policia tha se droga i përkiste Otoniel, një nga organizatave më të rrezikshme kriminale të Kolumbisë. Gjatë operacionit, policia ka arrestuar 4 persona.
Vetëm në dy muajt e fundit forcat e sigurisë kolumbiane kanë konfiskuar 20 ton kokainë në Antiokia.
