Të paktën 32 persona u vranë, ndërsa mbi 40 u plagosën pas një shpërthimi pranë një qendre arsimore në Kabulin perëndimor, Afganistan.
“Al Jazeera” raporton, duke cituar burime qeveritare, se bëhet fjalë për një sulm vetëvrasës. Lajmi u konfirmua edhe nga zëdhënësi i Ministrisë së Brendshme afgane, Abdul Nafee Takour, i cili saktësoi se ngjarja ka ndodhur në zonën e 13-të të sigurisë të kryeqytetit.
Sulmuesi qëlloi në drejtim të rojes së institutit, më pas sulmoi një klasë dhe shpërtheu brezin e tij shpërthyes mes studentëve. E njëjta qendër arsimore “Kaj”, në lagjen Dasht al-Barshi, e banuar nga shiitë, ishte shënjestruar në vitin 2018.
