Java e parafundit në kampionatin italian ka dhënë një tablo edhe më të qartë sa i përket verdikteve finale të këtij sezoni në tabelën e klasifikimit.
Pasi siguroi titullin kampion Juventusi u mund me rezultatin 2-0 përballë Kaljarit në transfertë. Edhe pse tekniku Sarri nuk kishte hedhur 11 më të mirët e tij në fushë, ndeshja i vlejti për të parë gjendjen e ekipit.
Vendasit e mbyllën ndeshjen që në pjesën e parë ku protagonistë ishin Galjano dhe Simeone. Ndërsa Ronaldo sërish nuk arriti të gjente dot rrugën e rrjetës , duke u dorëzuar në garën për golashënuesin më të mirë të kampionatit dhe në Europë. Kjo, pasi Çiro Imobile shënoi në suksesin 2-0 të Lazios ndaj Breshias dhe shkoi në kuotën e 35 golave, duke kaluar kështu dhe Levandovskin.
Nga ana tjetër Roma blindoi vendin e pestë në kampionat pas triumfit të djeshëm përballë Torinos me shifrat 3-2 që bëri të pavlefshëm dhe suksesin 4-1 të Milanit ndaj Sampdorias. Të besuarit e Romës bënë një paraqitje të mirë në fushë edhe pse ishin vendasit ata që shënuan të parët.
Por avatazhi nuk zgjati shumë kur Xheko, Smollin, dhe Diavara përmbysën gjithcka. Torino u mundua të reagonte në minutën e 65 me një gol, por që mori vlerë vetëm për statistika.
Ky rezultat bën që Roma të sigurojë që një javë para fundit vendin e pestë, që çon në grupet e Ligës së Europës, duke detyruar Milanin që të marrë pjesë që në kualifikueset e turneut.
Por pavarësisht kësaj më herët Milani bëri detyrën përballë Sampdorias duke fituar bindshëm me shifrat 1-4 në transfertë.
Protagonisti kryesor i këtij takimi ishte padyshim Zlatan Ibrahimoviç me dy gola të shënuar dhe një asist. Ndërsa Calhanoglu dhe Leao i dhanë dhe goditjen finale skuadrës së Sampdorias, duke e mbyllur kështu sfidën me rezultatin 1-4.
