Kadilli: Berisha ta sqarojë çështjen me SHBA privatisht, të distancohet nga PD

Kandidati për kryetar i Partisë Demokratike, Fatbardh Kadilli, shprehet se shpallja “non grata” e Sali Berishës nga SHBA ka provokuar shumë emocione, veçanërisht mes mbështetësve dhe atyre që kanë rrugëtuar në politikë krah tij.

Përmes një postimi në “Facebook”, Kadilli beson se ish-kryeministri do ta sqarojë këtë çeshtje privatisht, si dhe do ta shmangë PD nga përfshirja në këtë situatë.

“Në 30 vjetorin e vendosjes se marrdhënieve diplomatike me Shtetet e Bashkuara, ky vendim sjell shqetësim për të gjithë. Kujtoj ende imazhet e drejtuesve demokratë Berisha dhe Pashko, si të ftuar specialë të këtij momenti historik.Sot, në një situate krejtësisht të përmbysur, Berisha i ka të gjitha mundësitë, synimet dhe etikën të mbrohet dhe ta sqarojë këtë çeshtje privatisht. Kam bindjen se ai do e shmangë PD nga përfshirja në këtë çështje të së djeshmes duke e marrë nën emrin e vet betejën finale për emrin dhe historinë. Partia Demokratike, si partia e atyre që formuluan idetë politike dhe u frymëzuan nga zëri dhe ethosi amerikan, do të jetë dhe duhet të jetë e qartë në qëndrimin ndaj vlerave të lirisë dhe demokracisë, dhe nuk do t’i kompromentojë në asnjë rast marrdhëniet me partnerin strategjik dhe mikun më të madh të Shqipërisë.”