Në 90-vjetorin e lindjes së shkrimtarit të madh Ismail Kadare, në qytetin e Korçës u organizua një aktivitet i veçantë përkujtimor. Në Galerinë e Artit Dixhital, kolosi i letrave shqipe u “rikthye” për publikun përmes inteligjencës artificiale, duke krijuar një përvojë unike për të pranishmit.
Kjo ide inovative u realizua nga Deon Gjoka, vetëm 12 vjeç, i cili përmes teknologjisë solli figurën dhe zërin e Kadaresë, duke ngjallur interes dhe emocione tek publiku.
“Sot kam realizuar dokumentarin për Ismail Kadarenë dhe avatarin e tij që flet, ishte pak e vështirë pasi ishte më i ndërlikuar krahasuar me videot e tjera që kam bërë. Kadarenë e njihja pak, por jo thellësisht, tani punova me veprat e tij e njoh më mirë”, tha Deon Gjoka.
Mësuesja e letërsisë, Albana Panolli, vlerëson se aktivitete të tilla janë një mënyrë efektive për t’i afruar nxënësit me librin dhe autorët shqiptarë, duke e bërë letërsinë më tërheqëse për brezin e ri.
“Fëmijët nuk e njohin Kadarenë, përveçsd në tesktet që janë në librat shkollore, por duke organizuar aktivitete të tilla ne japim mesazhe, që
ata njohur Kadarenë si një gjenial të letrave shqipe, si një prej autorëve më të mirë shqiptare dhe që na përfshiu në hartën artistike të Evropës. Përmes këtyre aktiviteve fëmijët bëhen më të më të vetëdijshëm, më të mirë, më empatikë ndaj na duhen më tepër aktivitete të tilla”, u shpreh mësuesja Albana Panolli.
Në këtë aktivitet kulturor, nxënësit e shkollës 9-vjeçare “Sevasti Qirjazi” interpretuan pjesë të ndryshme nga krijimtaria letrare e Ismail Kadaresë, duke dëshmuar se vepra e tij vijon të frymëzojë edhe brezat më të rinj./vizionplus.tv
