Një ndër personazhet më të dashura të ekranit tonë është padyshim Jonida Vokshi.
Aktorja dhe moderatorja e njohur shqiptare së fundmi është bërë pjesë e ekranit të Vizion Plus si moderatore e një prej spektakleve më madhështore, Gjeniu i Vogël. Në një intervistë në studion e Vizionit të Pasdites, Jonida ndau emocione e momente fantastike nga këto 3 puntata të talent show-t të suksesshëm.
E pyetur nga moderatorja Evi Reçi në lidhje me ato çfarë ka përjetuar në këto mbrëmje të këtij spektakli, Jonida, me emocion foli për fëmijët e talentuar që ngjiten në këtë skenë.
“Nuk e ke idenë Evi sa shumë të talentuar janë, jam e lumtur që përtej Gjeniut këta fëmijë janë artistët e ardhshëm të skenës sonë. Nuk e di çfarë hanë, si flenë, por di vetëm që janë të mrekullueshëm”, u shpreh ajo.
Ndër të tjera, Jonida përmendi edhe një ndër fragmentet më të vështira për t’u menaxhuar në skenë, atë kur u mbulua në lotë nga emocionet që idhuroi kënga e një prej konkurenteve.
“Ajo ishte një këngë shumë e bukur, më emocionoi që nga fillimi. Një këngë dedikuar një babai që nuk jeton më. E pashë që po me mbusheshin sytë me lot dhe duhej të dilja në skenë ta tregoja emocionin por të mos qaja, e kjo nuk ndodhi sepse unë nuk munda dot t’i mbaj lotët.”
Jonida gjithashtu foli për rikthimin në ekran pas një pauze prej gati 3 vitesh si moderator.
“E mendoja të kthehesha, por s’ma merrte mendja që do të vija në një format të tillë. Aq shumë e kam gjetur veten. Tanimë, për herë të pare, në karrierën time e shoh veten nga fillimi deri në fund pasi transmetohet puntata.”
Ndërkaq, nuk mund të mos fliste për kritiket më të mëdhenj në jetë e në profesion, ku tregoi se prindërit janë ata që e kritikojnë më së shumti.
“Ooo janë ata! Ata gjithmonë më kritikojnë ashpër. Madje, ndonjëherë u kërkoj të më lënë të shijoj diçka, aq të ashpër tregohen.”
