“Jam e nderuar që jam nuse në Skrapar”/ Kryemadhi: LSI lindi në këtë zonë

Gjatë prezantimit të kandidatit për deputet në Skrapar, Monika Kryemadhi u shpreh se LSI lindi në këtë  zonë, si një vlerë dhe një virtyt i “njerëzve që nuk pajtohen me të keqen”.

Kryetarja e LSI tha se është hartuar një plan pune që synon zhvillimin e kësaj zone.

“Vetë LSI ka lindur në Skrapar, jo vetëm si forcë politike, por është lindur si një vlerë, si një virtyt i njerëzve që nuk pajtohen me të keqen, e njerëzve që punojnë, iu shërbejnë njerëzve, u gjenden atyre dhe përveç asaj e shikojnë shërbimin ndaj qytetarëve dhe ndaj çdokujt si një nga pikat më të rëndësishme të komunikimit njerëzor. Ne sot jemi këtu në qytetin e Çorovodës për të prezantuar doktor Blenardin për kandidat për deputet, por që nuk mund të them thjesht kandidat, pasi jam e bindur që do të jetë deputeti i Skraparit, por edhe deputeti i Qarkut të Beratit, bashkë me Arditin, ku së bashku kemi bërë një plan pune për të ecur dhe për të zhvilluar më tej shumë gjëra të domosdoshme për këtë zonë.”

Kryemadhi shtoi më tej se Skrapari ka mundësi pafund të zhvillimit të turizmit, dhe, sipas saj, një nga mënyrat për t’i mbajtur të rinjtë në vendin e tyre është krijimi i vendeve të punës.

“Unë e kam pak të vështirë, nuk gjej dot fjalët pasi bashkohen fjalët e dashurisë, me mirënjohjen, me respektin për këtë zonë. Unë jam e nderuar që jam nuse në Skrapar, sepse vajzat dhe djali im janë vajza Skrapari, djali im është një djalë Skrapari dhe kjo është një gjë shumë e mirë, sepse edhe pjesa më e mirë e imja është nga Skrapari, pavarësisht se unë vetë jam dibrane dhe nuk e mohoj këtë gjë, por shqiptarë jemi të gjithë. Është ai virtyt që më ka bërë që të lidhem jashtëzakonisht shumë me këtë zonë. Ajo që e theksoj dhe që e them gjithmonë, ne kemi sfida goxha të mëdha përpara, sfida që kanë të bëjnë me zhvillimin ekonomik të zonës, me një plan pune që ne duhet ta hartojmë të gjithë bashkë, jo vetëm për Qarkun e Beratit, por specifikisht për Skraparin. Skrapari është një qytet që ka mundësi pafund të zhvillimit të turizmit, në mënyrë nga më të ndryshmet dhe për këtë duhet një plan, një infrastrukturë e posaçme. Po ashtu krijimi i vendeve të punës, që do të jenë të domosdoshme për t’i mbajtur të rinjtë këtu dhe që të mos largohen nga Skrapari.”