Këtë të premte u mbajt seanca e dytë dëgjimore në gjykatën e Hagës. I akuzuar për kryerjen e gjenocidit kundër palestinezëve, Izraeli mbrojti luftën në Gaza. Në fjalën e tij përfaqësuesi ligjor Tal Becker u përqendrua në brutalitetin e sulmeve të 7 tetorit.
“Ata torturuan fëmijët para prindërve, dhe prindërit para fëmijëve, dogjën njerëz, duke përfshirë foshnje të gjalla, përdhunuan dhe gjymtuan sistematikisht shumë gra, burra dhe fëmijë. Në këto rrethana, vështirë se mund të ketë një akuzë më të rreme dhe më keqdashëse se sa akuza kundër Izraelit për gjenocid” tha Becker.
Sipas Izraelit akuzat për gjenocid duhet të drejtohen nga Hamasi.
“Nëse ekziston një kërcënim për civilët palestinezë të Gazës, ai rrjedh kryesisht nga fakti se ata kanë jetuar nën kontrollin e një organizate terroriste gjenocidale që ka shpërfillje totale për jetën dhe mirëqenien e tyre”, tha Becker.
Izraeli i ka shpërfillur pretendimet e organizatave ndërkombëtare për vrasjen e civilëve në Gaza. Por megjithatë në Hagë është dërguar një ekip i plotë ligjor për tu përballur me akuzat për gjenocid.
