Izraeli godet me çdo formë në Liban pavarësisht thirrjeve për një armëpushim
Kryeministri izraelit Benjamin Netanyahu ka urdhëruar ushtrinë e vendit të vazhdojë të luftojë me “forcë të plotë” kundër Hezbollahut në Liban, pavarësisht thirrjeve nga SHBA dhe aleatët e tjerë për një armëpushim.
Ministria e Shëndetësisë e Libanit njoftoi se të paktën 92 persona u vranë në sulmet ajrore izraelite dje, të enjten , ndërsa qindra të tjerë kanë vdekur që nga e hëna.
Hezbollah konfirmoi se një sulm ajror në një ndërtesë apartamentesh në jug të Bejrutit vrau kreun e njësisë së tij të dronëve, Mohammad Suroor.
Frika për një luftë të gjithanshme midis Izraelit dhe Hezbollahut është në rritje, pas përshkallëzimit dramatik të sulmeve izraelite në Liban që nga e hëna.
Propozimi për armëpushim
Përshkallëzimi i armiqësive bëri që 12 vende të propozojnë një armëpushim tre-javor midis Izraelit dhe Hezbollahut të mërkurën.
Propozimi fillimisht ngjalli shpresa pasi ambasadori i Izraelit në OKB, Danny Danon, tha se vendi i tij ishte “i hapur ndaj ideve”.
Por deri të enjten ajo ishte refuzuar plotësisht nga lidershipi politik izraelit.
Pas mbërritjes në Nju Jork për Asamblenë e Përgjithshme të OKB-së, Netanyahu tha se Izraeli “nuk do të ndalet” në Liban derisa të arrijë të gjitha qëllimet e tij , “më e rëndësishmja kthimin e sigurt të njerëzve të veriut në shtëpitë e tyre”.
Shtëpia e Bardhë më vonë njoftoi se propozimi i armëpushimit ishte paraqitur në konsultim me Izraelin, pavarësisht nga garancia e Netanyahu disa orë më vonë se vendi i tij do të vazhdojë të luftojë.
Sekretari amerikan i Shtetit, Anthony Blinken, gjatë takimit të tij me Ministrin izraelit të Çështjeve Strategjike Ron Dermer, në margjinat e Asamblesë së Përgjithshme të OKB-së në Nju Jork, paralajmëroi se “përshkallëzimi i mëtejshëm” do ta bënte më të vështirë për banorët e Veriut kthimin në atdheun e tyre.
Nga ana e tij, Netanyahu siguroi të premten se delegacionet izraelite kanë pasur takime për të diskutuar dje propozimet e SHBA-së për armëpushim me Libanin dhe do të vazhdojnë diskutimet në ditët në vijim, duke shtuar se vlerëson përpjekjet e Uashingtonit./vizionplus.tv
