Pas gati 3 muajsh mbyllje dhe me mbi 33 mijë të vdekur nga COVID-19, Italia mori sot një tjetër vendim për rikthimin në normalitet, nisjen e fazës së 3.
Nga sot të gjithë qytetarët vendas dhe të huaj brenda zonës Shengen dhe ata të Britanisë së Madhe, mund të udhëtojnë lirshëm dhe pa asnjë kusht në të gjithë Italinë.
Fluturimet ndërkombëtare pritet të rifillojnë vetëm në tre qytete kryesore: Milano, Romë dhe Napoli.
Por mediat e vendit fqinj shkruajnë se pavarësisht rihapjes së kufinjve të brendshëm dhe të jashtëm, nuk do të thotë që virusi është zhdukur. Ndaj nisja e fazës së 3, do të thotë më shumë përgjegjësi personale për qytetarët.
Ministri i Jashtëm Luigi Di Maio me anë të një postimi në facebook e cilësoi 3 qershorin si një ditë tw rwndwsishme për vendin:
“Sot është një datë shumë domethënëse, pasi sot italianët do të jenë në gjendje të lëvizin lirshëm në të gjithë vendin… Hapja totale na lejon t’u tregojmë shteteve të tjera një Itali të bashkuar dhe kompakte, brenda së cilës është e mundur të lëvizni pa pengesa”, shkruan ministri i jashtëm Italian.
Vendi fqinj synon ringjalljen e industrisë kryesore të turizmit të goditur rëndë nga pandemia e koronavirusit.
Italia ishte vendi i parë evropian që u godit më rëndë nga koronavirusi dhe zyrtarisht ka raportuar më shumë se 33,000 viktima. Ditët e fundit duket se virusi po humbet fuqinë dhe një ditë më parë vendi regjistroi vetëm 55 viktima.
Edhe vendet e tjera të Europës kanë nisur fazat e rihapjes për rikthimin në normalitet.
