Policia e Kurbinit ka konfirmuar se eshtrat e gjetura në Mamurras i përkasin, Klevis Lleshit, i zhdukur në vitin 2020.
Eshtrat e të riut u gjetën në fshatin Shpërdhat të Mamurrasit nga banorë të zonës si pasojë e erozionit.
I riu ishte shpallur i zhdukur nga familjarët që në vitin 2020 pasi dyshohej se ishte marrë peng pranë Pallatit të Sportit në Burrel.
Që prej asaj kohe, Prokuroria e Matit kishte nisur hetimet për rastin e 24 –vjeçarit dhe konfirmimi i eshtrave të gjetura është bërë këtë të hënë.
Saga e vrasjeve në familjen Lleshi ka nisur dhjetë vite më parë. I ati i Klevisit, Xhavit Lleshi u vra në një pritë në vendin e quajtur “Pujkë” në vitin 2013, ndërsa pak vite më pas i është vrarë xhaxhai Hajredin Lleshi, pranë shtëpisë.
Kurbin/Informacion sqarues
Në lidhje me lajmin e publikuar në disa media, se ditën e sotme, në Mamurras, janë gjetur disa eshtra që i përkasin shtetasit K. Ll., sqarojmë se:
Në dhjetor të vitit 2020, në Mamurras, janë gjetur mbetje kockore që dyshohet se i përkisnin shtetasit K. Ll., të cilin familjarët e kishin deklaruar të humbur, në gusht të vitit 2020.
Instituti i Policisë Shkencore, pas ekzaminimeve, ka sjellë aktin e ekspertimit, me të cilin është vertetuar me anë të ADN-së, se mbetjet kockore të gjetura në Mamurras, në dhjetor të vitit 2020, i përkasin shtetasit K. Ll.
