Fshati i njohur turistik i Voskopojës tashmë është me qendër e të shëndetësore e cila do jetë në shërbim të banorëve të këtij fshati, por dhe turistëve të shumtë vendas dhe të huaj që kalojnë kryesisht fundjavën në këtë zonë.
Stafi shëndetësor në Voskopojë prej disa javësh është duke ofruar shërbimin për pacientët në ambjente tërësisht të rikonstruktuara me standarde bashkëkohore.
Kjo është bërë e mundur falë një investimi të Ministrisë së Shëndetësisë dhe Mbrojtjes Sociale prej 3.8 milionë lekësh në kuadër të programit të qeverisë për rikonstruksionin e 300 qendrave shëndetësore në të gjithë vendin.
Tashmë rreth 2200 banorët e njësisë administrative të Voskopojës mund të marrin shërbimin mjekësor në ambjente komode të rikonstruktuara, në të cilat gjenden të gjitha pajisjet e duhura mjekësore por edhe medikamentet e nevojshme.
Mjekja e Qendrës Shëndetësore në Voskopojë Arjola Naçi thotë se ky rikonstruksion ka qenë shumë i domosdoshëm pasi më parë i gjithë stafi mjekësor punonte në kushte shumë të vështira për shkak të amortizimit në vite të godinës.
Në këtë qendër shëndetësore ofron shërbim për pacientët një mjeke dhe 6 infermierë të cilët përveç vizitave që kryejnë çdo ditë pranë qendrës, shkojnë edhe në banesat e pacientëve jo vetëm të Voskopojës, por edhe të Shipskës, Krushovës, Lavdarit si dhe në Gjonomadh sipas rasteve dhe urgjencave që paraqiten.
