Departamenti amerikan i Drejtësisë ka ngritur dy akuza kundër ish-drejtorit të FBI-së, James Comey, në lidhje me dëshminë e tij para Kongresit amerikan.
Comey, i cili për kohë të gjatë ka qenë në shënjestër të kritikave të presidentit Donald Trump, akuzohet se ka gënjyer para Kongresit gjatë dëshmisë së tij në shtator të vitit 2020, lidhur me pyetjen nëse kishte autorizuar rrjedhjen e të dhënave të klasifikuara në media.
Në reagimin e parë pas aktakuzës Comey deklaroi se ishte i pafajshëm.
“Zemra ime është e thyer për Departamentin e Drejtësisë, por kam besim të madh në sistemin gjyqësor federal dhe jam i pafajshëm, kështu që le të bëjmë një gjyq dhe të ruajmë besimin”, tha James Comey, ish-drejtor i FBI-së.
Nëse shpallet fajtor, Comey mund të dënohet deri në pesë vite burg por ekspertë sugjerojnë se provimi fajtor i tij do të jetë i vështirë.
Aktakuza vjen disa ditë pasi Trump i bëri thirrje kryeprokurores së vendit, Pam Bondi, që të hetojë në mënyrë më të ashpër kundërshtarët e tij politikë, përfshirë Comeyn. Vetë Presidenti Trump përshëndeti vendimin.
“DREJTËSI NË AMERIKË! Një nga qeniet njerëzore më të këqija me të cilat ky vend është përballur ndonjëherë është James Comey, ish-kreu i korruptuar i FBI-së. Sot ai u padit nga një Juri e Madhe për dy akuza për krime të ndryshme”, tha Trump.
Trump kishte kërcënuar me burgosje rivalët e tij politikë që prej fushatës presidenciale, por aktakuza e së enjtes nënkupton se kjo është hera e parë që administrata e tij ka arritur ta sigurojë një përballje me një juri të madhe kundër njërit prej tyre.
