Ish-prokurori Ervin Karanxha ka hedhur akuza të rënda ndaj ish-Kryeprokurores Ina Rama, e cila ka qenë në detyrë në kohën kur ndodhi 21 Janari, ku u vranë katër qytetarë gjatë protestave.
I ftuar në “Quo Vadis” të moderatores Pranvera Borakaj në Vizion Plus, Karanxha tha se çështja është e vështirë për t’u hetuar, por duhen marrë në pyetje të gjithë aktorët e kohës.
Sipas tij, ka akuza se ish-kryeprokurorja ka marrë një shtëpi nga një bashkëpronar i një gardisti, çështja e të cilit ishte pushuar.
Pjesë nga biseda:
Karanxha: Ka ngjarje të ndodhura pas 21 Janarit, promovime të personave të caktuar, që tregojnë se çfarë ka ndodhur me 21 Janarin. Do të shihet nëse ka mospërputhje në thënie dhe do të ketë ballafaqime. Një fakt i rëndësishëm që ka thënë Arben Llangozi, i cili e ka deklaruar me siguri, është se Ina Rama ka marrë shtëpi nga një bashkëpronar i një gardisti, të cilit i është pushuar çështja.
Borakaj: Mendon se do të thirret ish-kryeprokurorja?
Karanxha: Duhet hetuar pse u pushua çështja. U rrezikua jeta e shumë personave. Pse nuk u bënë veprimet në kohë? Na dalin lidhje që çështja është “underground”. Pse shkoi Basha te Bamir Topi? Duhet verifikuar nëse ai e njihte Ina Ramën. Duhet verifikuar nëse ka marrë shtëpi apo jo.
Borakaj: Ju, si prokuror i çështjes në atë kohë, çfarë lloj klime kishit?
Karanxha: Në marrjen e provave nuk kishim pengesa.
Borakaj: Asnjë ndikim?
Karanxha: Këqyrja e vendit të ngjarjes është bërë me oficerë të Drejtorisë së Policisë. Debatet politike dolën më pas, më 22 Janar. Ne provat i morëm: janë 117 gëzhoja të kalibrit 9 mm që kanë rezultuar nga ngjarja.
Borakaj: Fatkeqësia ishte që kishim katër viktima, por me kaq shumë gëzhoja do të kishim më shumë viktima.
Lita: Unë isha aty, aty i ka ruajtur Zoti njerëzit.
Karanxha: Po sikur ta kishte kthyer prapë Strasburgu, do thoshim pastaj çfarë ka ndodhur në 2005-ën.
Kapri: Është si arkeologji pastaj.
