Autoritetet iraniane deklaruan se 26-vjeçari Erfan Soltani, i cili ishte raportuar se do të ekzekutohej me varje për pjesëmarrje në protestat e fundit, nuk është dënuar me vdekje.
Sipas një deklarate të transmetuar nga mediat shtetërore iraniane, përfaqësues të drejtësisë sqaruan se Soltani akuzohet për “komplot kundër sigurisë së brendshme të vendit” dhe për “veprimtari propagandistike kundër regjimit”. Megjithatë, ata theksuan se dënimi me vdekje nuk parashikohet për këto akuza, edhe nëse ato vërtetohen në gjykatë.
Soltani thuhet se mbahet i ndaluar në institucionin qendror korrektues të Karaxhit, ndërsa familjarët e tij kishin bërë të ditur më herët se ishin njoftuar për shtyrjen e ekzekutimit të tij.
Ndërkohë, ministri i Jashtëm i Iranit, Abbas Araghchi, në një intervistë për rrjetin amerikan Fox News, deklaroi se “nuk ka asnjë plan për varje” dhe se “ekzekutimi është jashtë çdo diskutimi”.
/vizionplus.tv
