Apple dhe Samsung dominuan listën e dhjetë telefonave më të shitur për periudhën janar-mars, sipas raportit më të fundit të Counterpoint Research.
Nga dhjetë telefonat më të kërkuar, nëntë ishin nga këto dy marka, ndërsa Xiaomi ishte e vetmja markë tjetër që arriti të hyjë në këtë renditje, raportojnë mediat ndërkombëtare.
Modeli më i shitur ishte iPhone 16, i cili shënoi rikthimin e fortë të versionit bazë të iPhone për herë të parë që nga viti 2023. Ky telefon pati një performancë të lartë sidomos në rajonin e Lindjes së Mesme dhe Afrikës, si dhe në Japoni, ku shënoi rritjen më të madhe të shitjeve.
Në vend të dytë renditet iPhone 16 Pro Max, ndjekur nga iPhone 16 Pro në vendin e tretë. Modelet e serisë 16 Pro përbënin pothuajse gjysmën e totalit të shitjeve të iPhone gjatë këtij tremujori.
Në vendin e katërt renditet iPhone 15, ndërsa në vendin e pestë gjendet telefoni më i shitur i Samsung, Galaxy A16 5G.
Në vijim, në vendin e gjashtë është Galaxy A06, ndërsa në vendin e shtatë qëndron Galaxy S25 Ultra, si e vetmja pajisje premium e Samsung që arriti të futet në dhjetëshen më të mirë.
Në vendin e tetë renditet Redmi 14C, e vetmja pajisje Xiaomi në këtë listë, e ndjekur nga Galaxy A55 në vendin e nëntë dhe iPhone 16 Plus në vendin e dhjetë që plotësojnë renditjen.
/vizionplus.tv
