Berlini është vënë në alarm nga sulmet kibernetike. Një paralajmërim ka ardhur nga Agjencia e Inteligjencës së Brendshme e Gjermanisë, e cila ka akuzuar drejtpërdrejt Rusinë se ka ndërmarrë këto sulme kundër vendeve të NATOS dhe BE-së.
Sipas agjencisë gjermane ky paralajmërim është lëshuar bashkë me Byronë Federale të Hetimeve të Shteteve të Bashkuara, Agjencinë Amerikane për siguri kibernetike CISA dhe partnerë tjerë ndërkombëtarë.
Ky reagim vjen në kohën e rritjes së shqetësimeve në Evropë për mundësitë e goditjes nga hakerat dhe spiunëve rusë, që nga nisja e luftës së Moskës në Ukrainë.
Më herët Berlini e ka akuzuar Rusinë për kryerje të disa sulmeve kibernetike kundër Social-Demokratëve në pushtet, si dhe ndaj disa kompanive tjera që merren me logjistikë, mbrojtje, hapësirë ajrore dhe sektorë të teknologjisë informative.
Në paralajmërimin e lëshuar të hënën, agjencia gjermane ka thënë se grupi rus, i njohur si “Ariu i hirte”, ka kryer aktivitete me qëllim të spiunimit dhe sabotazhit.
Ndërkohë një ditë më parë dy shtete, anëtare të NATO-s, përkatësisht Rumania dhe Letonia thanë se dronët rusë shkelën hapësirën e tyre ajrore, ndërsa kanë nisur hetimet në lidhje me këto veprime të ndërmarra nga Moska./vizionplus.tv
