Zyra e Inspektorit të Lartë të Drejtësisë ka publikuar bilancin e punës për vitin 2024, ku bëhet e ditur se janë finalizuar 6 inspektime tematike, nga të cilat kanë dalë 54 rekomandime për gjykatat dhe zyrat e prokurorive.
Sipas të dhënave zyrtare, 9 rekomandime lidhen me marrjen e masave për miratim ose nxjerrje aktesh, 29 rekomandime me ndërmarrjen e veprimeve administrative, ndërsa 15 rekomandime i janë drejtuar vetë Inspektorit të Lartë të Drejtësisë.
Që nga krijimi i institucionit, janë realizuar në total 21 inspektime, prej të cilave 12 kanë përfunduar, me 118 rekomandime të dhëna, të publikuara në faqen zyrtare www.ild.al.
Struktura e Posaçme kundër Korrupsionit dhe Krimit të Organizuar (SPAK) ka qenë gjithashtu objekt inspektimi nga ILD, konkretisht në drejtim të praktikës së caktimit të çështjeve dhe zëvendësimit të prokurorëve. Inspektimi ka synuar të evidentojë nëse brenda kësaj strukture respektohen standardet e transparencës dhe ligjshmërisë në ndarjen e ngarkesave dhe rotacionin e prokurorëve në çështje me ndjeshmëri të lartë publike. Gjetjet e raportit të inspektimit për SPAK përfshihen në rekomandimet e dhëna nga ILD dhe janë të publikuara online.
Inspektimet kanë pasur në fokus:
- Trajtimin e ankesave për lirimin me kusht në 15 gjykata të shkallës së parë dhe në 5 ish-Gjykata të Apelit;
- Masat e sigurimit personal për veprën penale “Mbajtja pa leje e armëve”, në prokuroritë e Fierit, Shkodrës dhe Vlorës;
- Zbatimin e udhëzimeve të Prokurorit të Përgjithshëm mbi marrëdhëniet mes prokurorëve dhe drejtuesve, në disa prokurori në vend;
- Kontrollin e ndarjes së çështjeve me short dhe funksionimin e sistemit elektronik në gjykata, përfshirë Gjykatën e Lartë dhe gjykatat për Korrupsion dhe Krim të Organizuar;
- Praktikat e zëvendësimit të prokurorëve dhe caktimit të çështjeve, përfshirë edhe SPAK;
- Procedurat e shpalljes dhe arsyetimit të vendimeve, veçanërisht në Gjykatën e Rrethit Gjyqësor Tiranë dhe Gjykatën Administrative të Shkallës së Parë Tiranë;
- Informimi i palëve për ndërmjetësim, si pjesë e detyrimeve të gjyqtarëve.
Inspektimet janë zhvilluar si pjesë e planit vjetor të ILD-së, por edhe me kërkesë të institucioneve si Këshilli i Lartë Gjyqësor, Këshilli i Lartë i Prokurorisë, Ministri i Drejtësisë dhe Prokurori i Përgjithshëm.
Zyra e Inspektorit të Lartë të Drejtësisë vijon të luajë një rol kyç në garantimin e integritetit dhe llogaridhënies në sistemin e drejtësisë, duke përgatitur raporte që shërbejnë si bazë për veprime administrative, por edhe hetime disiplinore në raste të caktuara.
/vizionplus.tv
