Të paktën 13 persona humbën jetën dhe dhjetëra të tjerë janë plagosur pas shpërthimit të një vullkani në ishullin Java të Indonezisë.
Në këto video aspak të zakonta, banorët tentojnë ti arratisen llavës vullkanike e cila ka mbuluar fshatra të tëre. Një re gjigante hiri nga mali Semeru ka errësuar për disa orë zonën duke e bërë tejet të vështirë evakuimin. Shumë prej të plagosurve kanë pësuar djegie të rënda, ndërsa shtëpitë janë rrënuar tërësisht.
Linjat ajrore janë paralajmëruar për renë e hirit që ngrihet deri në 15,000 m. Mali Semeru është në një gjendje pothuajse të përhershme shpërthimi dhe rregullisht nxjerr hi deri në rreth 4,300 metra. Ai është një ndër 130 vullkanet aktive të Indonezisë e cila gjendet në “Unazën e Zjarrit” të Paqësorit, ku takohen pllakat kontinentale, duke shkaktuar aktivitet të shpeshtë vullkanik dhe sizmik.
