Kryeministri i Maqedonisë së Veriut, Hristijan Mickoski sot ka pritur në takim kryeministrin e Kosovës, Albin Kurti.
Gjatë konferencës për shtyp, Kurti është pyetur për incidentin e Osmanit në aeroport të Shkupit, ku iu kërkua t’i kontrollohej telefoni.
Kreu i qeverisë kosovare u shpreh se institucione kanë reaguar zyrtarisht dhe pritet që të zbardhet rasti. Gjithashtu Kurti theksoi se nuk mund të bëjë inspektorin e policisë dhe se nuk e sheh rastin si provokim.
“Nuk e di se kemi pasur qëndrim të tillë si institucione se ka qenë provokim, por jo institucionet Republikës. MPJD ka dhënë qëndrimin e saj që është qëndrim i Republikës së Kosovës, po ashtu kemi parë edhe qëndrimin e MPJ-së së Maqedonisë së Veriut. Besoj se duhet të synojmë të vërtetën dhe assesi tensionimin. Pra le të zbardhet rasti, janë institucionet që e bëjnë këtë. Ne s’mund të bëjmë edhe zyrtarin doganor, edhe zyrtarin policor edhe atë që mbikëqyr aeroportin”, tha Albin Kurti.
Lidhur me incidentin e presidentes së Kosovës ka reaguar dhe kryeministri i Maqedonisë së Veriut, Hristijan Mickovski, i cili tha se në vizitën e radhës, Osmanin do ta priste vetë në aeroport, për të mos pasur më situata të ngjashme si ajo e 1 gushtit.
“Na vjen keq që ka ndodhur një gjë e tillë. Pres që herave tjera, Osmani të më njoftojë për udhëtimin e saj, edhe atë privat, që të dal në aeroport ta pres miqësisht. Sjelljen e sigurimit në Aeroportin ndërkombëtar të Shkupit, Maqedonia do ta zgjidh me institucione vendore”, tha Hristijan Mickovski, kryeministër i Maqedonisë së Veriut. /vizionplus.tv
