Forcat e IKMT u ndalën sërish në Lezhë këtë të mërkurë për të përfunduar aksionin e nisur disa ditë më parë. IKMT prishi ndërtimet pa leje përgjatë vijës bregdetare.
Por ashtu si herën e parë, edhe kësaj radhe nuk munguan përplasjet. Kësaj here në debat u përfshinë gazetarët me shefin e rendit teksa po filmonin momentin e prishjes së ndërtesave.
Madje, njëri prej gazetarëve u shoqërua dhe më pas u lirua.
Aksioni i ndërmarrë nga inspektoriati kombetar i mbrojtjes se territorit për prishjen e objekteve pa leja përgjatë vijës bregdetare solli përplasje të ashpra para disa ditësh mes kryebashkiakut të lezhës Pjerin Ndreu dhe ministrit të Brendshëm, Sandër Lleshaj.
Kryebashkiaku socialist e cilësoi vendimin si abuziv pasi sipas tij po veprohet duke sfumuar kompetencat e autoriteteve vendore. Argument ky, që nuk u mirëprit nga ministri Lleshaj, i cili i kërkoi Ndreut që të zbatojë ligjin.