Ushtria izraelite njoftoi sot se ka gjetur trupat e nëntë militantëve të tjerë palestinezë, të cilët u vranë gjatë operacioneve të saj të fundit në pjesën jugore të Rripit të Gazës.
Sipas deklaratës zyrtare, gjatë operacioneve në sektorin lindor të Rafahut, ushtarët “gjetën edhe nëntë terroristë të tjerë që ishin neutralizuar brenda infrastrukturës nëntokësore terroriste”.
“Deri më tani, më shumë se 30 terroristë që u përpoqën të shpëtonin përmes këtyre tuneleve janë neutralizuar”, thuhej më tej në njoftim.
AFP raportoi të enjten se po zhvillohen negociata për fatin e dhjetëra militantëve të Hamasit, të cilët prej javësh janë të bllokuar në tunele në zonat e Gazës të kontrolluara nga ushtria izraelite.
Dje, duke e pranuar për herë të parë situatën që u zbulua më herët këtë muaj nga i dërguari special amerikan Steve Witkoff, Hamasi u kërkoi vendeve ndërmjetëse të ushtronin presion mbi Izraelin për të lejuar që luftëtarët e tij të dalin në mënyrë të sigurt nga tunelet.
Sipas kushteve të armëpushimit të arritur midis Izraelit dhe Hamasit, nën presionin e SHBA-së dhe i cili hyri në fuqi më 10 tetor, ushtria izraelite është tërhequr përtej “vijës së verdhë” brenda Gazës, një zonë që megjithatë i lejon asaj të mbajë ende kontroll mbi më shumë se 50% të enklavës palestineze.
Një burim nga një prej vendeve ndërmjetësuese bëri të ditur se SHBA-ja, Katari, Egjipti dhe Turqia po punojnë për “një kompromis që do t’u mundësonte luftëtarëve të Hamasit të tërhiqeshin nga tunelet përtej vijës së verdhë, pranë Rafahut”.
“Sipas propozimit aktual, atyre do t’u garantohej kalim i sigurt drejt zonave që nuk kontrollohen nga Izraeli, në mënyrë që kjo çështje të mos shndërrohet në një pikë tensioni që mund të çojë në shkelje të reja të armëpushimit ose në rrëzimin e tij”, tha burimi.
Një zyrtar i Hamasit në Gazë deklaroi se “60 deri në 80 luftëtarë” të organizatës mbeten ende në tunelet nën Rafah.
I pyetur në fillim të nëntorit, një zëdhënës i kryeministrit izraelit Benjamin Netanyahu i kishte thënë AFP-së se kreu i qeverisë nuk ishte i gatshëm t’u ofronte atyre kalim të sigurt.
Armëpushimi vazhdon të mbetet tepër i brishtë, me të dyja palët që akuzojnë njëra-tjetrën për shkelje të përditshme, ndërsa Rripi i Gazës, i shkatërruar nga operacionet ushtarake izraelite, po përballet me një krizë të rëndë humanitare.
