I dërguari i posaçëm i Shteteve të Bashkuara, Steve Witkoff, ndodhet në Moskë, ku pritet të zhvillojë takime me zyrtarë të lartë rusë. Vizita e tij vjen vetëm dy ditë përpara përfundimit të afatit të vendosur nga Shtëpia e Bardhë, i cili kërkon nga Moska hapa konkretë drejt një armëpushimi me Ukrainën.
Presidenti amerikan, Donald Trump, ka paralajmëruar masa të reja ndëshkuese ndaj Rusisë nëse nuk arrihet përparim në këtë drejtim. Këto masa përfshijnë vendosjen e tarifave mbi eksportet ruse dhe sanksione dytësore ndaj vendeve që vazhdojnë të blejnë naftë nga Rusia, një lëvizje që synon të rrisë presionin ndaj Kremlinit për t’i dhënë fund luftës që nisi në shkurt të vitit 2022.
Zyrtarët amerikanë kanë theksuar se sanksionet dytësore do të fokusohen kryesisht tek Kina dhe India, të cilat janë blerëset më të mëdha të naftës ruse.
Ndërkohë, pas nisjes së udhëtimit të Witkoff drejt Moskës, presidenti ukrainas Volodymyr Zelensky bëri të ditur se Ukraina i ka propozuar Rusisë një nismë për “qetësi në qiell”, që nënkupton ndalimin e sulmeve ajrore me raketa apo dronë, si dhe ndaljen e goditjeve ndaj infrastrukturës civile dhe energjetike.
/vizionplus.tv
