Në listat e partive kryesore tërheqin vëmendjen ata kandidatë që për herë të parë i futen gares për në Kuvend.
Një kandidat për herë të parë për në Kuvend është Toni Gogu, aktualisht prefekt i qarkut të Tiranës, në garë për Partinë Socialiste.
I ftuar këtë të mërkurë në studion e lajmeve në “Vizion Plus”, Gogu deklaroi se Shqipëria është një kantier i madh jo vetëm ndërtimi, por edhe reformash, falë qeverisjes së socialistëve.
“Unë jam numër 11, lista është e hapur. I dedikohet PS për shkak sepse është një bashkësi e mrekullueshme që gjen guximin për të hapur vendin e vetë edhe për rishtarë si unë; i dedikohet socialistëve të vjetër dhe banorëve të Vaqarrit, Prezës, Ndroqit, kreut të PS dhe drejtuesit të qarkut Tiranë. Si mund t’i quajmë show 1 mijë banesat e rindërtuara, 1600 shtretërit që iu shtuan spitaleve COVID, ngritjen e shkollave. Ideja është që nuk do as sy as mend që Shqipëria është një kantier i madh jo vetëm rindërtimi, por reformash në të gjitha sektorët.”
Për Gogun, Shqipëria duhet të ndahet njëherë e mirë nga emigracioni dhe të vazhdojnë rrugën drejt integrimit të saj në BE.
“Duhet të ndahemi nga e kaluara e emigracionit, e kaluara e padrejtësisë, duam të shkojmë drejt Shqipërisë evropiane; ekipi i PS është gjëja më e rëndësishme për ne që t’ia dalim mbanë në këto zgjedhje.”
