Pas vendimit të Gjykatës së Lartë të Shteteve të Bashkuara, e cila bllokoi pjesën më të madhe të taksave të mëparshme gjithëpërfshirëse, sot kanë hyrë në fuqi tarifat e reja globale prej 10% për importet, të vendosura nga Presidenti i SHBA-së, Donald Trump.
Urdhri ekzekutiv u firmos vetëm pak orë pas vendimit të gjykatës, duke aktivizuar menjëherë masën e re doganore. Kreu i Shtëpisë së Bardhë ka paralajmëruar se tarifa mund të rritet deri në 15%, por deri tani nuk ka një vendim zyrtar për ndryshimin e saj.
Gjykata Supreme vendosi se presidenti kishte tejkaluar kompetencat kur përdori Aktin e Fuqive Ekonomike të Emergjencës për të vendosur tarifa globale vitin e kaluar.
Trump argumenton se tarifat synojnë uljen e deficitit tregtar, i cili ka arritur në rreth 1.2 trilionë dollarë, duke shënuar një tjetër rekord.
Ndërkohë, reagimet ndërkombëtare nuk kanë munguar. Mbretëria e Bashkuar paralajmëroi masa reciproke nëse preket marrëveshja me SHBA-në, ndërsa Bashkimi Evropian sinjalizoi pezullim të proceseve të ratifikimit të marrëveshjeve tregtare. India shtyu bisedimet për finalizimin e një marrëveshjeje.
Ekspertët paralajmërojnë rritje të pasigurisë dhe rrezik për përshkallëzim të një lufte të re tregtare globale.
/vizionplus.tv
