Një kirurg në Florida është akuzuar për vrasje nga pakujdesia pas vdekjes së një pacienti 70-vjeçar, si pasojë e një gabimi të rëndë gjatë një ndërhyrjeje kirurgjikale. Ngjarja ka ndodhur në gusht të vitit 2024 dhe ka shkaktuar reagime të forta në opinionin publik.
Kirurgu 44-vjeçar, Thomas Shaknovsky, është paditur nga një juri e madhe me akuzën e vrasjes nga pakujdesia të shkallës së dytë. Ai është arrestuar dhe ndodhet në paraburgim, ndërsa pritet të dalë përpara gjykatës për t’u përballur me drejtësinë.
Sipas raportimeve, gjatë një operacioni të planifikuar për heqjen e shpretkës, mjeku ka hequr gabimisht mëlçinë e pacientit, William Bryan. Ky gabim fatal shkaktoi hemorragji të pakontrollueshme, duke çuar në vdekjen e 70-vjeçarit në sallën e operacionit.
Rasti u zbulua pas autopsisë, e cila tregoi se shpretka e pacientit ishte e paprekur, ndërsa mungonte mëlçia. Gjithashtu, u hodhën poshtë pretendimet fillestare të mjekut për një aneurizëm të çarë. Në dosje thuhet se kirurgu vazhdoi ndërhyrjen edhe pasi pacienti pësoi arrest kardiak dhe se kishte ushtruar presion ndaj tij për të pranuar operacionin.
Pas ngjarjes, autoritetet i kanë hequr licencën mjekësore kirurgut në disa shtete, ndërsa ndaj tij rëndojnë edhe akuza të tjera për raste të ngjashme të neglizhencës mjekësore. Ndërkohë, familja e viktimës ka ngritur padi civile dhe kërkon drejtësi për humbjen tragjike.
/vizionplus.tv
