37 vjecari turk, Gokmen Tanis është arrestuar pak orë pas sulmit të dyshuar terrorist në Hollandë që i mori jetën 3 personave ndërsa disa të tjerë mbetën të plagosur. Ai arriti të arratisej menjëherë pas sulmit ndërsa agjentë të shumtë policie u vunë në ndjekje të autorit.
Sipas burimeve, 37 vjeçari ishte arrestuar më parë për lidhje të dyshuara me të ashtuquajturin Shtet Islamik disa vjet më parë, por u lirua më pas. Masat e sigurisë në vend janë rritur ndjeshëm. Shkollat janë mbyllur, qarkullimet e trenave janë anulluar, gjithashtu janë shtuar forcat e policisë pranë xhamive dhe aeroporteve.
Dëshmitarët thanë për mediat se dëgjuan të shtëna e më pas panë një grua të shtrirë në tokë. Kryeministri Mark Rutte, tha se ndihej thellësisht i shqetësuar për ngjarjen e rëndë. Ai anulloi të gjitha bisedimet javore të planifikuara për koalicionin qeveritar. Ndërkohë policia u bëri thirrje qytetarëve të shmangnin vendet publike dhe zonën e sulmit për shkak të rrezikshmërisë së lartë.
