Detaje të reja kanë dalë në dritë pas operacionit policor në Maliq, ku mbeti i vrarë efektivi i “Shqiponjave” Enea Mekolli dhe u plagos kolegu i tij, Edison Adri, gjatë përpjekjes për kapjen e të shumëkërkuarit, 43-vjeçarit Violand Braçellari.
Gjatë kontrollit të fermës, hetuesit gjetën kallashnikovin e përdorur kundër policisë, një pushkë model 56, një cifte si dhe municione të shumta. Po ashtu është zbuluar edhe një radio policie.
Prokuroria dhe Agjencia e Mbikëqyrjes Policore po hetojnë zbatimin e procedurave nga Drejtoria e Policisë së Korçës, por bëhet e ditur se nuk janë gjetur shkelje. Kjo, pasi autoritetet e kanë vlerësuar në mënyrë korrekte rrezikshmërinë e Braçellarit, i cili ishte i dënuar vetëm për prodhim dhe shitje të lëndëve narkotike dhe jo për vepra të rënda penale që lidhen me jetën.
Ndërsa kërkesa për ndërhyrjen e forcave RENEA vlerësohet rast pas rasti dhe nuk është detyrim që zbatohet në çdo operacion policor.
Aksioni për arrestimin e Braçellarit u organizua në kohë të shpejtë, pas denoncimit të bërë më 3 qershor nga çobani, që kishte vetëm dy javë që ishte punësuar në stallat e tij. Ai kishte treguar se Braçellari e kishte kërcënuar me jetë dhe nuk kishte pranuar t’i jepte pagesën për punën e kryer.
Megjithatë, po vijon mbledhja e provave dhe dëshmive për të zbardhur plotësisht rrethanat e vrasjes së policit dhe plagosjes së kolegut të tij.
Autori i krimit, Violand Braçellari, rezulton me një të kaluar problematike. Në vitin 2004, në moshën 21-vjeçare, ai është paraqitur në Forcat e Armatosura, por qëndroi vetëm tre ditë dhe më pas nuk është rikthyer më në repart. Vite më vonë, ai u dënua me 10 vjet burg për kultivim kanabisi, por megjithatë jetonte në fshat i pashqetësuar, duke zhvilluar edhe një biznes në fushën e blegtorisë.
Madje, familja e tij kishte përfituar 20 mijë euro ndihmë nga fondet e AZHBR për ngritjen e stallave të bagëtive.
Është ende e paqartë sesi një person me rrezikshmëri shumë të lartë shoqërore, i dënuar dhe i kërkuar edhe nga RENEA, ka mundur të bëjë biznes e madje të marrë edhe mbështetje financiare nga shteti.
/vizionplus.tv
