Një ditë pas zjarrit që përfshiu pallatin ku jetonin 69 familje, në rrugën “Sali Butka” në zonë e ish parkut të autobusëve, kanë nisur hetimet se çfarë e shkaktoi zjarrin që mund të kishte përfunduar në një tragjedi nëse të gjithë banorët e rrezikuar nuk do të kishin dalë jashtë në kohë.
U deshën 10 orë që ekipet e zjarrfikëses të shuanin flakët që përpinë pallatin , dhe këtë mëngjes kur çdo gjë është bërë shkrumb dhe hi, një grup ekspertësh po kërkon për shkaqet e zjarrit kat pas kati.
Dyshimet paraprake janë se zjarri nisi në katin e dytë dhe më pas përmes një paneli ndërlidhës i të gjitha kateve të pallatit, flakët u përhapen më gjerë.
Të ndihmuara edhe nga materiali me të cilin ishte ndërtuar fasada, flakët u përhapen deri në 5 kate në mënyrë të frikshme.
Sipas banorëve herë pas herë ka pasur probleme me energjinë, pasi binte automati.
Ndërsa për sa u përket dëmeve materialeve, ekspertët vlerësojnë se 3 apartamente jane djegur plotesisht, 1 tjeter 30% dhe 10-13 apartamente të tjerë janë djegur pjesërisht.
