Deputeti i opozitës, Myslim Murrizi e sheh si një hap pozitiv faktin që Prokuroria e Posaçme Antikorrupsion ka nisur hetimet për tenderat e Ministrisë së Shëndetësisë.
Në një ndërhyrje për edicionin qendror të lajmeve në “Vizion Plus”, Murrizi tha se ky është një fillim i mbarë për të përballur me drejtësinë zyrtarët.
“Një lajm i mirë por është fillimi i punës së SPAK, qëllimi që është ndërtuar që prej 2016 e gjithë reforma në drejtësi. Ka shumë punë, jo vetëm tek Ministria e Shëndetësisë, por edhe Ministria e Mbrojtjes, e Infrastrukturës, tek Fondi Shqiptar i Zhvillimit dhe kudo ku ka patur para publike prej vitesh. Për mua SPAK duhet të ndjekë paratë për të çuar para drejtësisë zyrtarët publikë, të kujtdo krahu politik qofshin. Fakti që prej 10 ditësh ministrja e Shëndetësisë uk denjon të përgjigjet në SPAK, unë kam bërë një kërkesë që Ministria e Shëndetësisë dhe disa instiucione të tjera të vënë në dispozicion dokumentet zyrtare për tenderat nga viti 2014 dseri në 2019. Ishalla është hetim për të zbardhur të vërtetën dhe jo një akt i SPAK për të pastruar qeverinë.”
Demokrati nuk la pa komentuar as zhvillimet e fundit për reformën zgjedhore. Ai deklaroi se refuzon të njohë një produkt që vjen nga diskutimet në Këshillin Politik.
Sipas Murrizit, nga kjo tryezë do të dalë vetëm pazari i radhës. Votën e tij për reformën zgjedhore opozitari e kushtëzoi me ndryshimin e sistemit zgjedhor.
“Është një emërtesë hibrido-mashtruese të pazarit të radhës të Ramës, Bashës dhe të LSI. Këshilli politik nuk figuron në asnjë nen të Kushtetutës. Se nga e kanë shpikur, nuk e di. Mund të ngre edhe unë një trup të tillë, a do të ketë vlerë? Shqipëria është një shtet anëtar I NATO, një vend formalisht demokratik dhe ka institucione. Kush mblidhet jashtë institucioneve, janë njerëz që diçka fshehin. Çfarë kanë këta që nuk vijnë në komision? Këta nuk duan reformë zgjedhore, ndaj mblidhen skutave, bëjnë shou. Kjo nuk është marrëveshje, është pazar për të mbajtur shqiptarë jashtë vullnetit të tyre për të zgjedhur me votë. Është ping-pong. Nuk votoj asnjë lloj buzëkuqi të Kodit Zgjedhor nëse nuk preket sistemi zgjedhor, tu japim mundësi shqiptarëve të zgjedhin, jo të votojnë.”
