Ramush Haradinaj i bën thirrje kryeministrit të ri të Kosovës, Albin Kurti që të mos e heqë taksën ndaj mallrave që vijnë nga Serbia dhe të kthehet në “procesin dialogues të konsumuar”.
Ish-kryeministri i ka kërkuar Kurtit që të largojë taksën për kontratën finale për njohje reciproke në kufijtë ekzistues, ndërsa shtoi se Kosova i ka dakordësuar tri të drejta.
“Ke ofertu heqjen e taksës, e po të ofrohet kthim në procesin dialogues, tashmë të konsumuar e komprometuar. Mos e heq taksën për rikthim në proces të konsumuar e komprometuar, por oferto për kontratë finale për njohje reciproke në kufijtë ekzistues. Kosova i ka dakorduar tri të drejta: Asociacionin në bazë të Kushtetutës, të drejta të zgjeruara për komunitetin serb sipas orientimit të Planit të Ahtisarit, dhe status të veçantë për Kishën Ortodokse Serbe sipas Projektligjit për Liritë Fetare. Oferto heqjen e taksës për Kontratën Finale për njohje në kufijtë ekzistues, jo për rikthim në proces dialogues tashmë të konsumuar e komprometuar.”
Në mbyllje të shkrimit drejtuar Kurtit, Haradianj i tha se nëse shkon rrugës së parë për kontratën finale për njohje, do ta ketë përkrahjen e tij dhe të Aleancës. Mirëpo, nëse vazhdon me ofertën për kthim në proces të konsumuar e komprometuar, Haradinaj e ka porositur se do të mbajë përgjëgjësi për pasojat.
