Pas inspektimit të aksit rrugor Librazhd–Prrenjas, tashmë i stabilizuar dhe me qarkullim normal për të gjitha mjetet, përfshirë edhe tonazhin e rëndë, kreu i qeverisë Edi Rama zhvilloi një takim me banorët e zonës.
Gjatë bashkëbisedimit me ta, Rama u ndal te situata e krijuar nga rrëshqitja e dheut në zonën e njohur si “Arrat e Gurrës”, duke theksuar se qëllimi i vizitës ishte verifikimi nga afër i problematikës dhe sqarimi i opinionit publik mbi atë që, sipas tij, është interpretuar gabimisht.
Ai shtoi se zona ka pasur edhe më herët probleme të ngjashme për shkak të përbërjes gjeologjike të terrenit.
Rama: Qëllimi i kësaj vizite ishte të shikonim nga afër atë plagën e hapur prej 150 metrash që ka shkaktuar gjithë këtë shqetësim, por që ka shkaktuar edhe një rrebesh balte të prodhuar nga makineria e baltës politike dhe mediatike që ka tunduar 700 tenxheret me akuza, shpifje dhe fantazi se medemek u shemb rruga nga korrupsioni. Është e qartë se bëhet fjalë për segmentin e vjetër dhe rrëshqitja lidhet me një fenomen natyror. Ju keni një përfaqësues legjendar në këtë zonë, Taulant Ballën, i cili ma ka thënë që zona historikisht ka pasur probleme me rrëshqitjet për shkak të gjeologjisë. E vërteta në fund gjthmonë del dhe fiton, duhet vetëm durim dhe këmbëngulje për të vazhduar drejt. Më vjen keq që kjo ka ndodhur dhe ka shkaktuar shumë shqetësime dhe ka prishur ritmin e jetës për shumë banorë, por ne sot jemi këtu edhe për të bërë qartësi mbi një kalendar pune dhe mbi afatet e reja që i kemi vënën vetes.
Për shkak të rrëshqitjes masive të tokës, juglindja e vendit ishte e izoluar për 11 ditë. Qarkullimi, përmes një segmenti provizor prej 200-300 metrash, i paasfaltuar në vendin e quajtur Arrat e Rrugës, u rikthye më 3 mars. Segmenti provizor, kalon përmes rrugës së vjetër të shembur dhe trasesë ku po punohetpër Korridorin 8 dhe do të funksionojë me sinjalistikë kantieri.
Sipas ARRSH-së, ky segment provizor do të shtrohet kur të arrihet stabiliteti i shtresave të tokës. Qarkullimi në këtë devijim provizor do të kryhet derisa të ndërtohet rruga alternative 1.3 km.
