Mijëra refugjatë kanë shfrytëzuar pandeminë e koronavirusit për të hyrë ilegalisht në vendet e Bashkimit Europian. Por përpjekjet e tyre duket se do të sjellin dyndje pasi BE njoftoi një ditë më parë hapjen e kufijve pas bllokimit për shkak të pandemisë. Në raportin e publikuar nga Agjencia Evropiane për Mbrojtjen e Kufijve FRONTEX, pjesa më e madhe e refugjatëve që vijnë nga Lindja e Mesme, shfrytëzuan rrugën e Mesdheut lindor nga Turqia drejt Greqisë. Vetëm në muajin maj u regjistruan më shumë se 3.700 kalime ilegale.
Po ashtu, në Mesdheun qendror, nga Libia në Tunizi për të mbërritur në Itali, u regjistruan mbi 1000 kalime ilegale të kufirit, pra një rritje me 40% krahasuar me muajin prill të këtij viti. Nderkohe ne rrugen tjeter përmes Mesdheut perëndimor, pra nga Maroku drej Spanjës, u regjistruan 650 kalime të paligjshme të refugjatëve vetëm në muajin maj.
Frontex ka shtuar forcat e patrullimit në kufinjtë e vendeve të BE-së pas paralajmërimeve për një valë të re kryesisht në kufitin greko-turk. Covid 19 pengoi qeverinë e Kiriakos Mitsotakis të zbatonte planin për përforcimin e kufirit rreth lumit Evros,duke bërë që mijëra refugjatë të shfrytëzonin pandeminë dhe të tentonin kalimin e kufirit në mënyrë të paligjshme.
Agjencia Evropiane për Mbrojtjen e Kufijve FRONTEX, kishte paralajmëruar më herët se heqja e kufizimeve do të pasohet me lëvizjen masive të refugjatëve që vijnë nga vendet e Lindjes së Mesme.
