Grida Duma ka dhënë dorëheqjen nga posti i nënkryetares së Partisë Demokratike.
Ky vendim vjen pas rezultatit humbës që PD mori në zgjedhjet e pjesshme vendore të 6 marsit, dhe debateve brenda kampit blu mes disa deputetëve dhe Lulzim Bashës, të cilët i kërkuan këtij të fundit që të largohej.
Duke e konsideruar gjendjen e PD-së në ditët e saj më të vështira, ajo shkruan se “traumat e humbjeve të njëpasnjëshme” nuk po rikuperohen, e për këtë fajëson kryedemokratin Lulzim Basha.
“Partia Demokratike e Shqipërisë është në ditët e saj më të vështira. Traumat e humbjeve të njëpasnjëshme nuk po rikuperohen sepse Lulzim Basha i përdor dhe negocion që dështimet e Partisë Demokratike t’i kthehen në fitime të tij. Ndonëse shumica e grupit parlamentar i kërkoi me maturi politike të ndërmarrë akte të përgjegjshme dhe të japë dorëheqjen, Lulzim Basha përdori një pakicë të zhgënjyerish për të goditur deputët, ata më të votuarit dhe më përfaqësuesit e Partisë Demokratike. Fakti që Lulzim Basha nuk largohet edhe pasi shumica e grupit parlamentar i kërkoi dorëheqjen kërkon nga të gjithë ne vendimarrje për shpëtimin e demokratëve të sakrifikuar një dekadë. Megjithëse personalisht nuk kam asnjë përgjegjësi në vendimarrje dhe ia kam shkruar e lënë të dokumentuara vendimet e dëmshme që ka marrë, sot deklaroj që jap dorëheqjen si Nën/Kryetare e Partisë Demokratike, duke qenë ky vetëm një prej vendimeve të domsdoshme për demokratët. Partia Demokratike është fituese, demokratët do fitojnë!”
