Të paktën 700 fluturime janë anuluar në tre aeroporte të Gjermanisë, për shkak të grevës së punonjësve të tyre. Protesta e sindikatave preku Duseldorfin, Hamburgun dhe Kolnin këtë të enjte, ndërsa të premten do të bllokohet edhe aeroporti i Shtutgardit.
Sipas shoqatës gjermane të aeroporteve, mbi 100 mijë pasagjerë do të preken nga pezullimi i fluturimeve.
Greva vjen pas negociatave të dështuara për rritjen e pagave, që sindikatat e punonjësve po kërkojnë për të kompensuar kostot e jetesës, të cilat janë rritur më shumë për shkak të inflacionit.
Përveç grevave në aeroporte, edhe sindikata e hekurudhave dhe transportit ka paralajmëruar ndërprerje të punës. Shërbimet e tyre nuk do të funksionojnë nga ora 03:00 e mëngjesit të së premtes, deri në orët e mesditës.
Pasagjerët janë këshilluar të riplanifikojnë udhëtimet e tyre, pasi trafiku pritet të jetë i rënduar të paktën në pjesën e parë të ditës së premte.
Inflacioni i lartë në ekonominë më të madhe të Europës ka shkaktuar një valë grevash gjatë muajve të fundit, kryesisht nga sindikatat e punonjësve të transportit.