Greqia nuk ka shënuar asnjë viktimë gjatë 24 orëve të fundit. Për rrjedhojë, numri i vdekjeve qëndron në total në 146.
Autoritetet në shtetin fqinj raportuan këtë të martë 10 raste të reja COVID-19, duke e çuar gjithsej në 2.642 numrin e të infektuar nga Covid-19.
Greqia nisi të hënën fazen e parë të hapjes së vendit. Mbi 26 mijë kompani, aktivitetet e të cilave ishin pezulluar që nga fillimi i marsit me vendim të qeverisë, janë përsëri në shërbim të qytetarëve grekë.
Hapja e dyqaneve do të shoqërohet me masa mbrojtëse, si mbajtja e një distance prej dy metrash mes njerëzve dhe përdorimi i maskave.
Lehtësimi i masave do të shoqërohet me gjoba të rënda, të cilat variojnë nga 2 mijë deri 100 mijë euro për ato biznese që nuk respektojnë rregullat, si dhe pezullim deri në 90 ditë të aktiviteteve të mëdha.
