Një shqiptar dhe dy italianë janë vënë në prangat e policisë si pjesë e një grupi të organizuar kriminal, që vepron në Itali, Shqipëri dhe vende të tjera.
Në kuadër të operacionit të koduar “Transportuesi 2018”, i zhvilluar nga Policia e Shtetit, në bashkëpunim me Policinë italiane, është arrestuar me qëllim ekstradimi drejt Italisë, shqiptari E. M., 30 vjeç, lindur në Ersekë dhe banues në Durrës.
Ky operacion pati si qëllim goditjen e një grupi të organizuar kriminal, që vepron në Itali, Shqipëri dhe vende të tjera, me aktivitet trafikimin e narkotikëve, kryesisht të llojit heroinë, kokainë dhe marijuanë, në nivel kombëtar dhe ndërkombëtar.
Ndërkohë vazhdon kryerja e veprimeve hetimore për dokumentimin e plotë të veprimtarisë së paligjshme të këtij grupi të strukturuar kriminal.
