Policia greke godet një grup të trafikut ndërkombëtar të drogës nga Shqipëria në Greqi, dhe ka vënë në pranga 21 shtetas shqiptarë e grekë.
Sipas autoriteteve greke grupi trafikonte marijuanë përmes kufirit greko-shqiptar në Igumenicë dhe me pas e transportonte në Athinë. I njëjti grup kryente dhe shpërndarjen e marijuanës por edhe drogave të forta në vende të ndryshme të Greqisë.
Gjatë operacionit me 21 të arrestuar janë sekuestruar 142.5 kg marijuanë, 3.3 kg kokaine, 1 pistoletë dhe 16.756 euro. Këtij grupi në operacione të mëparshme i janë sekuestruar 140 kg marijuanë, 650 gram kokainë dhe 400 gram heroinë, ndërkohë llogaritet që prej shtatorit 2018 ky grup ka arritur të trafikojë e shesë rreth 500 kg marijuanë, 6 kg kokainë dhe 1 kg heroinë.
Ndërkohë nuk ka asnjë informacion në lidhje me identitetin dhe se sa shqiptarë janë të arrestuar.